Førleikameting verður fyrireikað

Frá seminari um førleikameting, sum Yrkisdepilin og NVL skipaðu fyri 31. august og 1. september 2016.

Í Yrkisdeplinum í Mentamálaráðnum verður arbeitt við at fyrireika og íverkseta førleikameting í Føroyum:

Lógin um førleikameting varð samtykt í løgtinginum 15. mai 2014. Lógin heimilar, at einstaklingar 25 ár og eldri við í minsta lagi 3 ára starvsroyndum hava møguleika at verða førleikamettir í sambandi við at teir ætla sær at taka eina útbúgving, ella um teir umhugsa at betra støðu sína á arbeiðsmarknaðinum.

Síðan lógin varð samtykt hevur verið arbeitt við at fyrireika og íverkseta førleikametingina. At fáa eina vælvirkandi førleikametingarskipan at virka krevur drúgva og neyva tilrættislegging. Hetta kunnu grannalond okkara bert ásanna:

Hóast førleikameting er kend og roynd í flestu londunum kring okkum, verður alsamt arbeitt við at bøta um og dagføra verandi skipanir. Í Íslandi hevur verið arbeitt við at fáa førleikameting setta í verk heilt síðan 2002. Men ikki fyrr enn í 2010 varð lóg um eftirútbúgving samtykt, og í henni eru ásetingar um førleikameting. Síðan tá eru einir 1500 íslendingar førleikamettir innan umleið 30 yrkisgreinir.

Eitt tað fyrsta stigið, ið neyðugt er at taka, nú vit skulu seta førleikameting í verk í Føroyum, er at útbúgva tey, sum skulu standa fyri hesum arbeiði. Í fyrsta umfari snýr tað seg um at útbúgva vegleiðarar, undirvísarar og førleikametarar, ið skulu standa fyri og útinna førleikametingina. Talan um fólk, ið eru knýtt at verandi útbúgvingarstovnum og fakfólk úr vinnuni, sum eru von við at meta um fakligu førleikarnar hjá teimum, ið taka eina útbúgving.

Í tí sambandi varð skipað fyri seminari um førleikameting innan yrkisútbúgvingar. Umleið 40 fólk, umboðandi útbúgvingarstovnar, fakfeløg og vinnuna, tóku lut á seminarinum, sum varð hildið í Havn 31. august og 1. september. Á seminarinum vóru framløgur og bólkaarbeiði, har eitt nú serfrøðingar í førleikameting í Íslandi greiddu frá íslendsku skipanini á økinum og løgdu lag á í sambandi við bólkaarbeiðið.

Á hesi heimasíðu hevur tú møguleika at kunna teg nærri um tað, sum varð umrøtt á seminarinum um førleikameting 31. august og 1. september 2016.